【周遊關西】令和潮遊!大阪 / 京都行程景點攻略!附地址、Google Map、交通、網址!每日更新

【訂房必備】每日更新!酒店優惠代碼大集合
AE白金信用卡.迎新送$900 SOGO+40,000里!全年$5一里!美心6折!戲飛買一送一


日本踏入令和年代,新紀元究竟潮甚麼?日本達人周奕瑋 (Jarvis) 又開始帶大家潮遊關西啦!每晚睇完電視之後,可以睇睇小編呢篇攻略!有齊每集介紹嘅餐廳及玩樂景點,搵埋地址及交通方式比大家!可以跟住嚟個令和潮遊!

第1集:2019令和潮什麼
第2集:跟大阪人去賞櫻
第3集:拉麵控必試創新拉麵 非一般關西住宿
第4集:大阪朝市遊樂團 關西飯桶食堂
第5集:大阪名物新味道 京都和服限定優惠
第6集:抵唔抵靠自己 關西全身體驗
第7集:京都「掘竹筍」體驗 跨越年號的老店
第8集:網上呃like大搜查 創意產品逐件睇
第9集:發掘大阪新世「堺」 地上最強聯乘食品
第10集:食家味覺大考驗 潮買心意手信

第一集

1廣島蠔牛肉

之前食過海膽牛肉,Jarvis 今次繼續開拓食之新潮流:蠔 X 牛肉!呢間位於京都嘅餐廳用廣島蠔配上牛肉,將鮮味提升8倍!再歎啲就記得試試壽喜燒,加埋白蛋汁、黑毛和牛一齊食!

三条食彩ろぉじ堺町の道

地址:京都府京都市中京區堺町通三条下ル道祐町135-1
電話:+81-075-285-1891
交通方式:於京都地鐵 (烏丸線)「烏丸御池站」/ 阪急電鐵 (京都線)「烏丸站」步行8分鐘
網站:https://karasumaoikelunchjosikai.owst.jp/zh-tw/

2綜藝節目遊戲

日本綜藝節目睇就睇得多,嚟到大阪呢個室內主題樂園,可以親身玩下 Variety sports!一人挑戰又得,同朋友組隊玩答問題都得,感覺好似上電視玩遊戲咁!

VS Park

地址:大阪府吹田市千里万博公園2-1 EXPOCITY
電話:+81-06-6369-7186
交通方式:於大阪單軌電車 (本線 / 彩都線) 「萬博紀念公園站」步行5分鐘
網站:https://bandainamco-am.co.jp/others/vspark/

3紅寶石朱古力

呢舊咁靚嘅粉紅色朱古力,唔係士多啤梨味,而係紅寶石朱古力 (Ruby Chocolate)!除咗一排嘅朱古力同蛋糕之外,仲有期間限定嘅甜品,5月底前去堂食都可以食到!好睇又好食!

WITTAMER Chocolat Bar

地址:大阪府大阪市北區梅田3-1-1 大丸梅田店 B1
電話:+81-06-6341-2007
交通方式:於JR「大阪站」步行1分鐘
網站:https://www.wittamer.jp/shops/umeda_daimaru.html

4Zipline 過山車

一次過感受晒 Zipline 同過山車!Jarvis 今次去玩呢隻激新嘅 Roller Zip,刺激得嚟又有得睇靚景!而係關西首座、日本最長嘅 Zipline 過山車嚟!大家亦可以跟 Jarvis 一樣於日落時段去睇景,或者倒後玩!

Glamping Palm Garden 舞洲 by WBF

地址:大阪市此花區北港緑地2-3-57
電話:+81-06-6465-4690
交通方式:於大阪地鐵 (中央線)「宇宙廣場車站」2號出口乘搭「北港バス 2番のりば」巴士至「ホテル・ロッジ舞洲前」步行5分鐘 / 於 JR 「環球影城站」乘搭免費接駁車 (班次時間表)
網站:https://www.hotelwbf.com/palmgarden/rollerzip/index.php

5激罕黃金蟹

潮食混血蟹!Jarvis 今次帶大家去食松葉蟹與紅楚蟹 Mix 出嚟嘅黃金蟹!一千隻中只有一隻係黃金蟹,而且每年9月至5月底先食到,勁旱有!無論食刺身定 Shabu Shabu 都超鮮甜,再連埋黃金蟹膏一齊食就最正啦!

香住 北よしお初天神店

地址:大阪府大阪市北區曽根崎2-10-19 2/F
電話:+81-06-6311-7716
交通方式:於大阪地鐵 (谷町線)「東梅田站」步行2分鐘
網站:http://kasumikitayoshi.com/kitayoshiohatsu.html

第二集

6大阪城賞櫻 BBQ

嚟到大阪城公園賞櫻,可以睇睇「標本木」染井吉野櫻,就係靠佢嚟決定「滿開日」日子啦!除咗野餐,大家亦可於大阪城公園燒烤。上網 book 定位,就可以兩手 fing fing 嚟賞櫻!

大阪城公園燒烤

地址:大阪府大阪市中央區大阪城1-1
電話:+81-057-0060-062
交通方式:於JR「大阪城公園站」步行10分鐘
網站:https://digiq.jp/bbq/recommend/osaka

7水上 SUP 河畔賞櫻

喺水之都大阪,當然要睇睇河畔櫻花啦!Jarvis 今次搭水上 SUP (立槳) ,更靠近岸邊,櫻花就喺正頭頂,食埋年糕同關西風櫻餅就最正!不過呢隻 SUP 係春 / 冬季限定,冬天去先有被爐!

City Sup

地址:大阪府大阪市中央区北浜東1-2 川の駅はちけんや
電話:+81-06-6125-0550
交通方式:於大阪地鐵「天滿橋站」步行1分鐘
網站:https://www.citysup.jp

8主題公園睇櫻花

「枚方公園」可以話係大阪最 local 嘅主題樂園,仲係賞櫻熱點添!搭過山車感覺好似衝落去櫻花群咁,可以睇到枚方市嘅景色!想浪漫啲,就可以搭摩天輪,靜靜地賞住櫻享受二人世界!

枚方公園

地址:大阪府枚方市枚方公園町1−1
電話:+81-072-844-3475
交通方式:於京阪電鐵「枚方公園站」步行5分鐘
網站:http://www.hirakatapark.co.jp

9蛋包飯「傳道師」

呢間餐廳有蛋包飯「傳道師」為客人烹調蛋包飯,每一個步驟都好似場表演咁,將蛋放上炒飯上,再一刀切開,就成為超美味嘅「超鬆軟反轉蛋包飯」!Jarvis 都大讚畫面夠治癒!

Kichi Kichi Omurice

地址:京都府京都市中京區材木町185-4
電話:+81-075-211-1484
交通方式:於京都地鐵「三條京阪站」步行5分鐘
網站:http://kichi2.net

10狂人雞刺身 / 串燒

Jarvis 繼續拜訪料理狂人,今次食雞刺身!將一隻雞切到二十幾個部位,做成25款雞刺身,雞腎、雞心、雞冠都有得食,而串燒同樣美味!想食就記得上網預訂,成為會員再 book 位!

熊の焼鳥

地址:大阪府大阪市北區天神橋6-3-26
電話:+81-06-6353-6330
交通方式:於大阪地鐵「天神橋筋六丁目站」步行1分鐘
網站:https://kuma-no-yakitori.com

第三集

11Emoji Menu 鴨拉麵

唔識日文都睇得明 Menu!呢間京都拉麵店用 Emoji 嚟寫 Menu,都幾得意喎!雖然 Menu 簡單,但呢度嘅鴨拉麵一啲都唔簡單!拉麵湯底同樣係用鴨肉嚟熬,啖啖都係鴨味!

Gion Duck Noodles

地址:京都府京都市東山區祇園北側329
電話:+81-72-396-6749
交通方式:於京都京阪電鐵「祇園四条站」步行5分鐘
網站:https://www.facebook.com/Gion-Duck-Noodles-191143185068182

12極濃黑白鴨拉麵

又係鴨拉麵?今次係極濃黑白拉麵!雞白湯濃到成碗雞粥咁,夾麵時仲會有湯掛喺上面,好吸引!而雞黑湯就加入咗食用竹炭,有小小苦,鍾意新奇嘢嘅可以試試!

ぼっこ志

地址:大阪府大阪市中央区西心斎橋2-6-10
電話:+81-06-6213-8570
交通方式:於大阪地鐵 (御堂筋線)「難波站」步行4分鐘
網站:https://www.facebook.com/kokorozashigroup

13仙氣鯛魚沾麵

上次 Jarvis 介紹過東京鯛魚麵,依家嚟到關西,同樣有鮮味十足嘅鯛魚沾麵!最正嘅係,沾麵底放有乾冰,飄出陣陣仙氣!用嚟打卡呃 like 一流!

鯛白湯 Ramen ○de▽

地址:大阪府大阪市淀川區西宮原1-5-6
電話:+81-06-6152-637
交通方式:於大阪地鐵 (御堂筋線)「新大阪站」步行5分鐘
網站:https://www.instagram.com/marusan156

14京町家民宿

嚟到古色古香嘅京都,當然要入住傳統京町家!京町家分佈於市內各地,有不同大細及位置可以揀!而且有得預先於京都站放低行李,非常貼心!今次 Jarvis 介紹呢間京町家就夠晒大,最啱一大班人齊齊去玩!

京町家の宿 (京都二条 さわら木の宿)

地址:京都府京都市上京區講堂町243
電話:+81-050-2018-1700
交通方式:於京都地鐵「二条城前」步行10分鐘 / 於京都巴士「堀川丸太町站」步行2分鐘
網站:https://machiya-inn.net

15工業風歷史酒店

因為京都法例對樓宇高度有限制,所以市內嘅高樓唔多。而呢間酒店因為係50年前興建,所以係少見嘅四層高建築!酒店以 LOFT 工業風設計,仲有不同主題作佈置,藝術感十足,望出去景色絕美!

RC HOTEL

地址:京都市東山區八坂上町370番地
電話:+81-75-354-5406
交通方式:於 JR「京都站」乘坐 100 / 110 / 86 / 206號巴士,至「清水道站」步行5分鐘
網站:https://rchotelkyoto.com
預訂:AgodaBooking.comHotels.comExpediaTrip.com

16禪修宿坊體驗

想體驗日本寺廟嘅禪修宿坊,可以試試大阪嘅「和空下寺町」!有得住之餘,仲有畫佛、抄經及茶道等活動,加上有別具特色嘅精進料理,個人即刻清靜咗唔少呀!

和空下寺町

地址:大阪府大阪市天王寺区下寺町2丁目5-12
電話:+81-06-6775-7020
交通方式:於大阪地鐵 (谷町線)「四天王寺前夕陽丘」步行6分鐘 / 於大阪地鐵「惠美須町站」步行6分鐘
網站:https://waqoo-shitadera.com
預訂:AgodaBooking.comHotels.comExpediaTrip.comJAPANiCANRelux

第四集

17抽獎/拍賣海鮮市場

想去木津市場買生果、海鮮?識去梗係揀每月第二及最後嘅星期六、早上9點至12點去!因為呢個時間有隱藏版朝市,有得試食、拍賣,頭100位入場嘅會員有抽獎添!

木津市場

地址:大阪府大阪市浪速區敷津東2-2-8
電話:+81-06-6631-1131
交通方式:於大阪地鐵「大國町站」步行3分鐘 / 南海電鐵「今宮戎站」步行5分鐘
網站:https://kizu-ichiba.com

18周日限定朝市+捕魚體驗

星期日凌晨機到大阪的話,可以試下嚟呢個關西機場附近、周日限定嘅朝市買海鮮!出埋海捕魚都得添,捉到嘅魚仲有得 BBQ 返嚟食!

田尻漁港日曜朝市

地址:大阪府泉南郡田尻町りんくうポート北1番
電話:+81-072-465-0099
交通方式:於南海電鐵「吉見ノ里站」步行10分鐘
網站:http://www.tajiriport.com

19勁多海鮮「超痛風丼」

嚟到大阪食丼物,首選當然係海鮮丼!呢間飯堂最著名嘅「超痛風丼」有勁多海膽同魚子,再加埋蛋黃撈勻嚟食!正到 Jarvis 話痛風都值呀!

遊食遊膳笹庵

地址:大阪府豊中市服部南町1-3-9 2F
電話:+81-06-6863-0558
交通方式:於阪急電鐵 (寶塚本線)「服部天神站」步行3分鐘
網站:https://www.facebook.com/toyonaka.sasaan

20極飽肚開花牛肉飯

喺日本食牛肉飯都可以特別啲!呢間餐廳就有3倍份量嘅牛肉飯,無論飯同肉都係勁多!而用嚟送飯嘅「絕品醬」都好出名,撈飯一流!

Camel Diner

地址:大阪府大阪市中央區西心斎橋1-6-25 1F
電話:+81-06-6120-9622
交通方式:於大阪地鐵「四ツ橋」站步行5分鐘
網站:https://cameldiner.com

21米飯專家 飯桶食堂

鍾意食飯嘅「飯桶」一定唔可以錯過呢間飯堂嘅親子丼!因為佢哋係「煮飯達人」,煮出嚟嘅飯夥粒分明,就算淨食白飯都又甜又好食!

八代目儀兵衛

地址:京都府京都市東山區祇園町北側296
電話:+81-075-708-8173
交通方式:於京都地鐵「東山站」步行6分鐘 / 京阪電鐵「祇園四条站」步行8分鐘
網站:http://www.okomeya-ryotei.net

第五集

22米芝蓮章魚燒

大阪章魚燒食邊隻味最正?Jarvis 嚟食呢間米芝蓮推介嘅章魚燒,用龍蝦汁整,仲可以一次過試勻8款唔同味道!佢最推介七味粉蛋黃醬味,大家可以跟住試試,睇下邊款係你心水?

Takoyaki 玉屋

地址:大阪府大阪市北區國分寺1-3-4
電話:+81-06-6358-0866
交通方式:於大阪地鐵「天神橋筋六丁目站」步行3分鐘
網站:http://tamaya08.com

23意式大阪炸串

食炸串都可以食得特別啲!有意大利湯配炸串、意粉卷蝦炸串、米蘭風淡路牛炸串、鴨肝炸串,連甜品都有生果雪糕炸串添!

イタリアン串カツ&淡路牛 Papale il gru

地址:大阪府大阪市中央區東心齋橋1-2-17
電話:+81-050-3464-3358
交通方式:於大阪地鐵「長堀橋站」步行1分鐘 /「心齋橋」站步行5分鐘
網站:https://irgru.gorp.jp

24Fusion 大阪燒

食完意式炸串,試試 Fusion 大阪燒:忌廉芝士大阪、墨汁大阪燒!呢間餐廳用奶嚟開漿整大阪燒,而且用多咗蛋,所以好重蛋味及奶味!另外仲有蟹膏忌廉日式炒麵,炒到好似意粉咁!

大阪粉もんバルDENNER

地址:大阪府大阪市中央區東心齋橋1-18-4 2F
電話:+81-050-3374-6361
交通方式:於大阪地鐵「心齋橋」站步行3分鐘
網站:https://osakakonamonbal-denner.gorp.jp

25和服著物 Passport

喺京都著和服影相,簡直係完美嘅畫面!呢間和服店有多款和服任揀,著文青風款式、配條褲 casual 少少都得!

除咗有氣氛,大家亦可 download「著物護照」APP,於租和服、搭車、買嘢食等等都有 discount!

京都着物レンタル夢館|御池別邸

地址:京都府京都市中京區金吹町472-1
電話:+81-075-254-8920
交通方式:於京都地鐵「烏丸御池站」步行3分鐘
網站:https://www.tw-kyotooike.yumeyakata.com
預訂:https://www.klook.com/zh-HK/activity/1079-one-day-kimono-rental-kyoto

26京都原味道 漬物店

想試試傳統京都漬物,可以嚟呢間「西京漬」專門店!有各種魚類漬物任揀,買走食又得,留喺餐廳堂食都冇問題!著和服買嘢仲有9折、餐廳送抹茶添!

京都一の傳本店

地址:京都府京都市中京區柳馬場通り錦上る十文字町435番地
電話:+81-075-254-4070
交通方式:於京都地鐵「四条線」步行8分鐘 / 阪急電鐵「烏丸站」步行8分鐘
網站:http://www.ichinoden.jp

27陶器發洩專區

嚟到呢間陶藝 Workshop,除咗有得親手整陶器,原來仲可以將當中嘅失敗作扔爛嚟發洩!平時真係冇乜機會咁扔嘢,望到 Jarvis 咁扔法都覺得爽!

GALLERY 道半

地址:京都府京都市左京區下鴨前萩町13 B1
電話:+81-075-702-1657
交通方式:於京都地鐵「北山站」步行30秒
網站:http://michinakaba.com

第六集

28免費食龍蝦

免費食龍蝦咁著數?嚟到呢間蝦專門店,檯上有張啤牌,只要你揀嘅龍蝦重量尾數係同啤牌點數相同,下次再嚟就有得免費食龍蝦!而除咗龍蝦,其他蝦都同樣出名好食!

活海老bal orb Resort 裏難波

地址:大阪府大阪市中央區難波千日前2-17
電話:+81-050-5269-7194
交通方式:於大阪地鐵 / JR / 南海電鐵「難波站」步行5分鐘
網站:https://orb-resort.com

29夾牛肉遊戲+紅酒白酒放題

自己牛肉自己夾!Jarvis 帶大家嚟到「曽根崎初天神通」呢間餐廳,只要叫一杯飲品再加錢,就可以玩夾牛肉遊戲!喺牛肉塔上夾一次,夾到嘅牛肉就係屬於你嘅啦!另外仲有任飲紅酒、白酒嘅不限時放題,好似 Jarvis 咁紅酒配牛肉都幾正喎!

鉄板とワイン BUNCH

地址:大阪府大阪市北區曽根崎2-8-15 1F
電話:+81-06-6131-1755
交通方式:於大阪地鐵「東梅田站」步行2分鐘 / 「梅田站」步行4分鐘
網站:https://yoyaku.toreta.in/bunch

30超市食品任塞放題

大阪主婦最期待嘅活動!每逢三月最後一個星期五,呢間超市都會舉辦「超市食品任塞放題」!睇啱邊樣嘢,就攞個專用袋塞入去,只要塞得入就可以拎走!

北野エース (枚方T-SITE店)

地址:大阪府枚方市岡東町12-2 B1
電話:+81-072-845-6215
交通方式:於京阪電鐵「枚方市站」步行3分鐘
網站:https://www.ace-group.co.jp/store/184_526.html

31忍者 Stunt 體驗

忍者體驗唔係影張相就算,Jarvis 帶大家嚟跟特技師傅試試真正嘅「武打場面」!學完耍劍又有得吊威也!

Ikura Circus Osaka

地址:大阪府大阪市弁天2-2-9 1F
電話:+81-090-6052-3534‬
交通方式:於大阪地鐵「弁天町站」步行5分鐘
網站:https://circusosaka.weebly.com

32書道教室寫大字

書道係其中一個日本嘅傳統文化活動,想體驗一下,可以嚟 Jarvis 介紹呢間書道教室,有得用地拖咁大嘅毛筆嚟寫大字!

Green Rose Calligraphy

地址:京都府京都市中京區西ノ京内畑町29
電話:+81-080-4984-4862
交通方式:於京都地鐵 / JR「二条站」站步行5分鐘
網站:http://greenrose-calligraphy.com

第七集

33住吉大社尋找守護石

去「住吉大社」參觀,除咗著名嘅「反橋」,大家記得試試跟 Jarvis 去「五所御前」(位於第一本宮嘅南面) 一齊搵守護石!集齊三粒「五」、「大」、「力」石仔就可以祈願,又幾得意喎!買埋個御守袋入住就 prefect啦!

住吉大社

地址:大阪府大阪市住吉區住吉2-9-89
電話:+81-06-6672-0753
交通方式:於南海電鐵 (本線)「住吉大社站」步行3分鐘 / 南海電鐵 (高野線)「住吉東站」步行2分鐘
網站:http://www.sumiyoshitaisha.net

34掘竹筍體驗

京都出名有竹林靚景,但除咗睇景,每年四至五月份仲可以上山掘竹筍!參加呢個非牟利組織舉辦嘅活動,就可以試試掘竹筍!掘完就即刻用嚟製成「竹筍 Pizza」,夠晒新鮮!

NPO 法人加茂女

地址:京都府木津川市南加茂台4-15-6
電話:+81-0774-66-1895
交通方式:於 JR「加茂站」步行20分鐘 / 乘搭奈良交通巴士至「京內橋站」步行5分鐘
網站:http://www.npo-kamome.com

35自製庭園「箱庭甜品」

喺日本見到精緻又古雅嘅庭園,自己都想擁有一個!嚟到呢度,就可以自製「箱庭甜品」,用各項甜品放入箱中,成為你自己嘅專屬庭園,仲可以食落肚添!

Mamezo & Cafe (Dew 阪急山田店)

地址:大阪府吹田市山田西4-1-2 2F
電話:+81-06-6831-2039
交通方式:於阪急電鐵 (千里線)「山田站」步行2分鐘
網站:http://www.mamezo.co.jp

36古早味箱壽司

要試試大阪古早味,可以嚟到呢間跨越5個年號、有114年歷史嘅箱壽司店!依家由84歲嘅第三代傳人獨自經營,壽司飯入面有香菇、蝦又做得彈牙,充滿大阪古早味,值得一試!

寿し寅

地址:大阪府大阪市浪速區櫻川2-3-1
電話:+81-06-6561-4014
交通方式:於大阪地鐵「櫻川站」步行1分鐘

37傳承四代饅魚飯

鍾意食燒鰻魚的話,一定唔可以錯過呢間燒饅魚店!呢度使用傳統嘅關西燒法,由腹部劏開鰻魚嚟炭燒。加上祖傳嘅秘製醬汁,超入味!除咗饅魚飯,仲有加入咗牛蒡嘅「饅魚八幡卷」都一定要食!

うなぎじん田

地址:大阪府大阪市北區池田町7-6
電話:+81-06-6882-5115
交通方式:於 JR「天滿站」步行10分鐘
網站:http://www.unagi-jinta.com

第八集

38藝術畫甜品沙冰

靚到唔捨得食呀!呢間 Cafe 嘅沙冰使用多種生果及果汁製成,夠晒 Colourful!再經過店主妙筆一揮,即刻變咗一幅畫咁!沙冰有不同圖案,新年時連達摩都有!除咗沙冰,仲有「表裡不一」嘅特色食品,表明係蛋糕、實際上係煙肉意粉!

JTRRD cafe

地址:大阪府大阪市北區天滿3-4-5 1F
電話:+81-06-6882-4835
交通方式:於大阪地鐵 / 京阪電鐵「天滿橋站」步行6分鐘
網站:http://jtrrd.com

39夢幻少女風朱古力

Jarvis 手上呢舊咁靚嘅,並唔係番皂,而係朱古力!呢間專門店將朱古力製成一幅幅嘅畫作,當中有甜酒味、薑味、草莓味,味道同啲顏色一樣咁千變萬化!而除咗買朱古力,大家可以試埋堂食抹茶梳乎里!

Chocolat bel amer 京都別邸 (三条店)

地址:京都市中京區三条通堺町東入ル北側 桝屋町66
電話:+81-075-221-7025
交通方式:於京都地鐵「烏丸御池站」步行5分鐘
網站:http://www.belamer-kyoto.jp

40京都電車 Cafe

鐵道迷必去!呢間 Cafe 由40年前停駛嘅舊電車改建而成,比大家喺真實嘅車廂中歎咖啡、七彩雪糕,再食埋好得意嘅吊環麵包!除咗食嘢,呢度仲有電車Souvenirs 賣,例如襪、手巾及杯等,買比小朋友一定好開心!

市電カフェ

地址:京都府京都市下京區觀喜寺町1-15 市電ひろば505
電話:+81-90-3998-8817
交通方式:於 JR「梅小路京都西站」步行3分鐘
網站:https://www.facebook.com/shidencafe

41日本智能家電

成日喺網上見到日本嘅智能電器,覺得好科幻?嚟到大阪呢間電器鋪,就可以將智能家電真實地買返屋企!當中有看門機械人、充電保溫杯墊、Long d 電燈、手機鏡頭顯微鏡等,high-tech 又實用!

Area venture’Z

地址:大阪市中央區心齋橋2-11-9 201
電話:+81-06-4708-3928
交通方式:於大阪地鐵「四橋站」步行5分鐘
網站:http://cho-sen-jo.co.jp/area_venturez

42櫻花主題手作市集

如果大家同小編一樣,好鍾意行手作市集,就一定唔好錯過呢個櫻花市集啦!呢個手作市集超級大型,以櫻花做主題,有不同類型嘅產品賣,包括和服、飾物、公仔,食品。甚至自己買手作職人材料包,返屋企自製豉油都得!

市集係每年舉辦一次嘅,大家如果於明年春天 (約4月左右) 去大阪,就可以上網 Check 下會期係幾時,撞啱日子就去行市集!

Creema Craft Party

地址:大阪府大阪市住之江區南港北1-5-102
電話:+81-06-6612-8763
交通方式:於大阪地鐵 (南港港城線)「中ふ頭站」步行8分鐘
網站:https://craftparty.jp

Jarvis 推介檔攤網站

第九集

43吞拿魚主題樂園

吞拿魚迷必去!呢個「吞拿魚主題樂園」每日有幾場即劏表演,劏完即賣,夠晒新鮮!而所賣嘅刺身同壽司都係不計成本,件件都平靚正!

大起水產 (街のみなと まぐろパーク 堺店)

地址:大阪府堺市北區中村町607-1 堺中央綜合卸売市場
電話:+81-072-258-1002
交通方式:於大阪地鐵「新金岡站」乘搭南海巴士,至「八下中学校前站」步行2分鐘
網站:http://www.daiki-suisan.co.jp

44Vintage 百貨

嚟到大阪 Shopping 買古著,堺市同樣有筍貨!呢間 Vintage 專門店簡直係百貨公司,有衫褲、手袋、香水、樂器等!有埋古物鑑定師駐場,保證收返嚟嘅名牌貨一定係正版!

NEXT51 (三国ヶ丘店)

地址:大阪府堺市堺區向陵中町4-4-4
電話:+81-072-246-5535
交通方式:於JR / 南海電鐵「三国ヶ丘站」步行5分鐘
網站:https://next-51.com

45度身訂造私家廚刀

堺市有「菜刀之市」嘅稱號,嚟到唔只買靚刀,仲可以自製私家刀!呢間刀具店有幾百年歷史,不同種類嘅刀都有得賣!大家可以度身訂造刀具,體驗刻字、磨刀、上柄等工序!

道具屋 和田商店

地址:大阪府堺市堺區神明町東1-1-1
電話:+81-072-232-1886
交通方式:於阪堺電車「神明町站」步行1分鐘 / 南海電鐵「堺站」步行15分鐘
網站:https://www.sakaiwada.com/

46炸豬扒 X 鴨肝

搭40分鐘車嚟到八尾市,就可以嚟到 Jarvis 介紹呢間「地上最強」豬扒 Crossover 專門店!當中有勁多不同食材配搭豬扒,當中最正梗係炸豬扒 X 鴨肝!本身件豬已經炸得好食,再加埋鴨肝油同秘製醬汁,就成為地上最強啦!

Tonkatsu Mange

地址:大阪府八尾市陽光園2-3-22
電話:+81-072-996-0175
交通方式:於 JR「八尾站」步行4分鐘
網站:http://www.manger.co.jp

47茶碗蒸拉麵

呢碗茶碗蒸除咗 size 勁大,更加係特別在內有乾坤!其實佢係一碗「茶碗蒸拉麵」!另外仲有火焰芝士茶碗蒸拉麵,拉埋絲添!

丹頂

地址:大阪府大阪市港區築港3-8-7
電話:+81-06-6576-6826
交通方式:於大阪地鐵「大阪港站」步行3分鐘
網站:https://www.facebook.com/chawanmushi.tanchou

48Time Share Cafe

呢間位於京都河邊嘅「時間共享咖啡店」,有個好得意嘅經營 Concept。每日分成不同時段,由不同嘅 Producer 主理店鋪。所以不同時間嚟,就會試到唔同嘅嘢!

而 Jarvis 嚟到嘅當日,間 Cafe 就變成咗和果子專門店!店主以不同食材,製成創意和果子!例如有朱古力羊羹、檸檬最中!

みのり菓子 @ RiversideCafe

地址:京都府京都市左京區高野蓼原町25
交通方式:於京阪電鐵 / 叡山電鐵「出町柳站」步行7分鐘
網站:http://riverside-cafe.jp

第十集

49名牌豬「銘柄豚」

如何於日本刁鑽地食豬?Jarvis 帶大家去呢間食「銘柄豚」,一次過試齊五款不同高質豬!當中有不同調味料可供配搭,食落有不同風味!

豚美 (難波店)

地址:大阪府大阪市中央區難波1-5-8
電話:+81-06-6213-5291
交通方式:於地鐵「難波站」步行1分鐘 / 阪神電鐵「大阪難波站」步行1分鐘
網站:http://www.ton-bi.jp/category/nanba

50菇菌專門店

邊個話菇只可做配角?大阪呢間菇菌專門店,由不同類型嘅菇「擔正」!有8款菇嘅「黑松露野菌魔法鍋」,配埋黑松露膠原果凍嚟食!最後加入忌廉,即刻由和風變咗做洋風!

きのこの里 (南船場本店)

地址:大阪府大阪市中央區南船場4-10-20 1F
電話:+81-050-5869-3188
交通方式:於大阪地鐵「心齋橋站」步行3分鐘 / 「四ツ橋站」步行6分鐘
網站:https://twitter.com/kinokoryourioma

51新鮮VS熟成鯛魚

一樣嘅鯛魚都有不同食法!熟成係將魚肉清洗乾淨後,放置於0-3度嘅環境一段時間,令魚肉鮮味同甜味濃縮起來!嚟到呢間鯛魚專門店,就可以比大家試試新鮮同熟成鯛魚有咩唔同!

鯛之鯛 (難波店)

地址:大阪府大阪市中央區難波4-7-14 B1
電話:+81-06-6630-7714
交通方式:於近鐵 / 阪神電鐵「大阪難波站」步行1分鐘 / 大阪地鐵「難波站」步行2分鐘
網站:https://www.facebook.com/tainotainamba

52傳統圖案刺繡燙章

想買返啲具日本色彩嘅手信,就可以嚟呢間位於八阪之塔附近嘅刺繡店!有日本傳說妖怪嘅刺繡燙章,買比親朋好友自己燙喺邊都得!另外又有以日本文化做主題嘅紀念品,例如忍者晴天娃娃、目出鯛毛巾等!

京東都 (本店)

地址:京都府京都市東山區星野町93-28
電話:+81-075-531-3155
交通方式:於京阪電鐵「祇園四條站」步行15分鐘 / 阪急京都線「河原町站」步行18分鐘
網站:https://www.kyototo.jp

53味噌專門店

以為呢度係雪糕店?其實呢度一格格嘅係不同味道嘅味噌!有成36款任揀,有米味、麥味、黑大豆味,連柚子味都有!而且來自日本不同地方,用各地嘅著名土產嚟整!

蔵代味噌

地址:京都府京都市中京區堀之上町106
電話:+81-075-231-5020
交通方式:於京都地鐵「烏丸御池站」步行10分鐘
網站:http://www.kuradai-miso.com

54傷健人士手作店

買手信都可以支持到殘障人士!呢間店舖賣嘅全部都係由傷健人士親手製作嘅貨品,有碟仔、凸字紙袋、動物形曲奇餅,仲有傳統嘅西陣織袋!買到靚嘢之餘,又可以幫到人!

Heart Friends Store Kyoto

地址:京都府京都市中京區新京極通四条上ル中之町565-15
電話:+81-075-221-8033
交通方式:於阪急電鐵 (京都線)「河原町站」步行3分鐘
網站:https://kyoto-heartfriends.com

《周遊關西》行程景點位置一覽

(Photos credit: Copyright belongs to TVB)