Home 專題 荔園Super Summer 搶先玩!

荔園Super Summer 搶先玩!

想知道邊度買旅遊保險性價比最高?一 click 即可比較各大旅遊保險方案!


滿載香港人回憶嘅荔園,聽日下午6點就正式開幕啦!Big Fun Trip 搶先入「荔園Super Summer」試玩各大遊戲、景點。

20150625LaiYuen01
荔園重現

會食蕉會Poo Poo

一入門口就有「吸蕉大笨象」歡迎你,掟蕉比佢食,佢個口佢會好開心咁叫同噴水!最後仲會Poo Poo 添!

20150625LaiYuen02
講真,像真度幾高!

男神碰碰車

遊樂場就梗係唔少得「盞鬼碰碰車」!男神王宗堯同我哋親身試玩!

20150625LaiYuen03
果然係男神;就係呢一種眼神!

 

20150625LaiYuen04
好開心喎!


「瀡」落去嘅恐龍屋

除左有「吸蕉大笨象」,仲有龐然巨物「滑稽恐龍屋」!昔日嘅恐龍屋係要行入個恐龍館入面,然後好多恐龍郁嚟郁去!呢個滑稽版就變成一個「瀡」滑梯!「瀡」落去幾有速度感,但就感覺太快玩完!

20150625LaiYuen05
個樣都幾得意嘅!

 

20150625LaiYuen06
呢隻Q版恐龍屋唔係行入去嘅,係瀡落嚟!

我左眼同右眼都見到…

鬼屋「魔靈小學」係另一焦點!昔日嘅「神秘竇洞」係要坐架車入去,然後架車會嘭澎聲咁撞落啲門,一路深入去鬼屋嘅不同部分,好似去左十八層地獄咁!宜家呢個「魔靈小學」就無得坐車,要自己行入去,而且high tech 左,玩AR Effect,事前要用手機download 定隻app,入到去見到有射燈照住嘅地方記住用個app 對準佢,咁你左眼同右眼就會見到啲嘢!會見到啲咩?咁要你自己諗下了。

20150625LaiYuen07
外觀似昔日「神秘寶洞」迷你版

 

20150625LaiYuen08
有射燈照住嘅地方,記得用個人App對準佢!咦!米住先!後面有對腳嘅!

 

門後面到底係乜?
門後面到底係啲乜?

 

「魔靈小學」同「神秘竇洞」邊個好玩啲?講真,小弟都係懷念以前間鬼屋多啲,如果你抱住想玩返以前間鬼屋嘅心態,可能會失望都未定。不過呢個始終都係臨時版本,所以都好難比較嘅!

咁間鬼屋驚唔驚先?咁就見人見智了,小弟就全程無驚過,但同行嘅另一女記者就嚇到喊左!

玩幾耐㗎?其實都幾快行完!哈哈…


最啱情侶同一家大細

以前嘅空中單軌車,宜家變成「新巴城巴開心列車」,可以圍繞荔園半圈!仲有「快樂叮叮船」同「淘氣小木馬」,都係最啱情侶或一家大細玩。

20150625LaiYuen11
Q版列車

 

小朋友一定鐘意玩!
小朋友一定鐘意玩!

 

旋轉木馬,大人同小朋友都係一定一定鐘意玩!
旋轉木馬,大人同小朋友都係一定一定鐘意玩!

 

攤位遊戲唔少得

講起荔園一定諗起攤位遊戲,兩者嘅關係就係我等於你而你又等於我咁。除左「經典掟階磚」,今次仲加左好多其他新的攤位,不妨試下身手贏個獎品返屋企。

20150625LaiYuen13
經典中嘅經典

 

一試身手嘅時候!
一試身手嘅時候!

 

唔係唔影返夠本下話

場內當然有唔少影相位,最啱各位Selfie控,可以比你影到夠post 上FaceBook!

如果你知道呢隻嘢叫做咩,證明你有返咁上下「人生閱歷」!
如果你知道呢隻嘢叫做咩,證明你有返咁上下「人生閱歷」!

 

那些年的巨星!
那些年的巨星!

 

玩到呢度其實都好肚餓了!唔使驚!場內有「荔園冰室」、「香港大排檔」、「小忌廉餐廳」、「足球小將餐廳」… 多款懷舊食品等緊你!

「荔園Super Summer」詳情:

日期:2015年6月26日至9月初
地址:中環龍和道九號中環海濱活動空間
開放時間:早上11點至晚上11點 (6月26日下午6點開幕)
費用:免費入場,大部份遊戲須購買代幣 (代幣每個$10)

$680荔園兩人快證:

包括:兩條快證手帶、兩份紀念品同40個代幣總值$400
快證手帶可以由快證通道進入12處遊戲景點,包括:「魔靈小學」、「盞鬼碰碰車」、「百厭滑梯」、「新巴城巴(開心列車)」、「吹漲動物園」、「佻皮城堡」、「鬼馬飛天椅」、「夏日溜冰場」、「咖啡杯」、「滑稽恐龍屋」、「淘氣小木馬」、「快樂叮叮船」。

  • 「魔靈小學」係全園最貴嘅遊戲,玩一次要8個代幣,$80;
  • 「滑稽恐龍屋」同「快樂叮叮船」成人收4個代幣,6歲或以下小童則2個代弊;
  • 「盞鬼碰碰車」13歲或以上人士6個代幣,8至12歲3個代幣;
  • 「夏日溜冰場」5個代幣。

另外,園內有6個景點免費,包括「荔園城堡」、「電子哈哈鏡」等。