澳門 – Big Fun Trip 旅遊情報

【巴黎人．瘋玩篇】體驗夢工場：冰之歷奇、巨星大巡遊！再睇埋街頭藝人演出！

bigfuntrip — Mon, 15 May 2017 13:52:01 +0000

澳門新建酒店百花齊放，要喺眾五光十色的酒店突圍而出，以多元化娛樂為主題，能滿足各有不同喜好不同年齡層嘅旅客先係致勝之道。巴黎人酒店呢棟度假型酒店，一站式提供購物、餐飲、娛樂、遊樂各設施，無論係情侶定一家大小，全部玩完都起碼要兩日。

通往巴黎的隨意門

明明身處澳門，但小編一步入巴黎人購物中心，就好似開啟左多啦Ａ夢既隨意門，頓時置身於巴黎凡登廣場及香榭麗舍大道！從酒店華麗大堂既海神噴泉為起點，慢慢步入購物中心正中央既凡登廣場，再通往各個著名嘅巴黎購物街道，整個購物中心完全由巴黎標誌性建築及特色設計連貫。

凡登廣場既天花板更會投影與當日時間相應既天空

為咗重現巴黎的街頭風光 Streetmosphere，巴黎人購物中心每天都安排街頭表演，包括滾筒風琴表演、默劇、人像畫、真人雕像、17/18世紀俊男美女舞者穿梭人群中等。另外，巴黎人共有超過170多個品牌店鋪，其中Antonia、Sonia Rykiel、Temptation、Isabel Marant、MCQ、Sinequanone、Repetto、Carven、Zadig & Voltaire、MSGM、Garel Paris、IRO、Phase 8、Bora Aksu、Djula、Point de Vue、Germain、Debucci、Herzo、Lancaster Paris、Jean Rousseau、Isabelle Langlois 等多個品牌更加係首次進駐澳門。

小編尤其鍾愛滾筒風琴的現場表演。

巴黎人每日均會有默劇、華爾茲及真人雕像等街頭藝人演出。

好精彩嘅華爾茲

係浪漫街頭悠閒購物及欣賞表演，邊個話澳門只有賭場或美食呢？

酒店以巴黎做藍圖，只啱成年人去玩？巴黎人的多元化娛樂適合任何年齡層！

今時今日所有新酒店都必備水上樂園，而巴黎人除咗酒店住客專用嘅泳池外，仲有名為水世界 AQUA WORLD 嘅水上主題公園。

AQUA WORLD 水上主題公園

水世界及泳池同樣位於酒店6樓。水世界中間有一隻巨型飛船，飛船有水上管道、攀爬網、搖擺木橋和兩條高12米的滑梯。滑梯彎多又急，都相當刺激，飛船中間的熱氣球吊籃更會不定時倒水，行過都隨時中招！雖然水世界設施唔算多，不過成年人小朋友都啱玩又玩得開心，水世界入面仲有小食亭，玩足全日完全唔駛擔心餓親！巴黎人酒店住客入場玩仲可以有9折添。不過如果唔想俾錢入場，就去巴黎人泳池遊水都好OK 呀。

而住客專用的泳池一貫歐洲風格，可以邊暢泳邊欣賞巴黎鐵塔同紅磨坊風車！

水世界入場資料

開放時間： 夏季 (每日10am至6pm)
入場費用：週一至週五．每位MOP160 ；家庭套票 (買3送1) 每日澳門幣MOP480｜週六、週日及公眾假期．每位MOP180 ；家庭套票 (買3送1) 每日澳門幣MOP540
*入住客人可享 9 折購票優惠 (此優惠不適用於家庭套餐)。

玩冰之歷奇．瀡冰之滑梯

老實講，小編熱愛夢工場 (DreamWorks) 的程度，跟同行嘅小朋友不相伯仲！因為小編係買巴黎人嘅住宿套票， 裡面包括「體驗夢工場」冰之歷奇冰雕展的門票，好開心係冰雕展裡一次過見到史力加、功夫熊貓、馴龍記、荒失失奇兵等多個角色！冰之歷奇係亞洲最大型的室內冰雕展，由40位來自哈爾濱的冰雕藝術家運用250萬磅色彩繽紛的冰，設計出各個夢工場角色。

留意返，展場內只有零下8度，係堅係零下8度！而且係越玩越凍 ! 所以真心強調保暖衣物係必．須．！會場亦好貼心，大人同小朋友都可以免費借用外套！不過小編前後兩次借用既外套都有小小破爛，但都可以保暖嘅！如果各位介意就可以為自己或者小朋友自備保暖衣物啦！

進入展場後亦可以先把不必要嘅行李做寄放，就可以非常方便同夢工場玩一轉啦!

展覽唔單只有一系列以探險為主題的遊戲，最好玩最好玩最好玩 (好重要所以要講３次) 係果個冰滑梯！

看似平平無奇的滑梯，小編本來心想：咁大個人唔通走去玩呢條咁短既滑梯，點知，好玩到停唔到！

小編第一次瀡嘅時候唔知點解唔係幾郁，但同行女友人就出人意表地瀡得勁快！快到佢尖叫！到咗第二次，小編唔再瞓係度瀡，終於成功快速瀡落去！想睇小編瀡冰梯嘅「瘋姿」就 click 下面條片喇！同場加映夢工場大遊行。

「體驗夢工場」冰之歷奇冰雕展覽

日期：2017年3月16日至7月9日
場地：澳門威尼斯人金光會展F館
開放時間：11am至8pm (最後入場時間為晚上7:30pm)
票價：成人及小童 (3至12歲) $120元｜家庭套票 (包括三位家庭成員及一位3歲或以上小童)$312

【巴黎人．飲食＋鐵塔篇】食盡巴黎人Buffet＋法式午餐！再欣賞巴黎鐵塔的日與夜！

bigfuntrip — Sat, 15 Apr 2017 14:43:40 +0000

前排小編去咗澳門巴黎人睇「西遊記」，個package 包埋早餐或午餐buffet，小編本來想揀午餐，但同行旅友餓底，話等唔切食lunch 同埋晨早要飲杯咖啡充電，所以最後揀咗早餐！

必食巴黎人自助餐

之前都聽聞巴黎人個buffet 幾唔錯，今次親身試，睇下係咪真係掂。

首先，講種類，以早餐嚟講，款式算唔少！最驚喜係有魚生飯，而且食落新鮮！唔好諗住魚生飯呢啲正嘢會一早比人攞晒無得食，小編眼見不斷有補給，所以基本上係人人都有機會攞到的。

早餐竟然有魚生飯！

早餐最緊要食咩？小編就一定要食煎太陽蛋，因為就好似晨早見到太陽一樣，個人都醒神啲！唔好睇少一隻煎蛋，最基本嘅嘢做得好定唔好，可以睇到間餐廳有冇heart！小編對煎太陽蛋好有要求，一定要即煎到個底金黃色，仲有就係個邊要煎得香脆！呢度嘅煎太陽蛋小編好滿意，再配上至愛嘅茄汁豆、炒菇菇、車厘茄！簡簡單單卻十分滿足！除此之外，仲有腸仔、煙肉等，不過小編好少食加工肉類，所以無試到。

太陽蛋＋茄汁豆＋炒菇菇＋車厘茄＝完美的早餐

西式早餐，小編仲試咗烤豬脾，味道唔錯。

除咗西式嘢，仲有中式早餐供應，選擇有粥品、點心同粉麵。

中式點心

由於胃部空間有限，小編只揀咗豬手河粉嚟試，唔係講笑，啖啖骨膠原，味道仲拍得住澳門果幾家老麵店！

啖啖骨膠原嘅豬手河粉！

小編好注重健康，每日都要食大量蔬菜，現場Salad 菜有好多選擇，而且仲有頭盤小食。啱晒胃口！

美味頭盤小食！

如果鐘意有包落肚嘅話，呢度有大量選擇，牛角包、丹麥酥、Doughnut、蛋糕⋯⋯不過小編真係食得好飽，個肚只夠位放多一片綠茶蛋糕，味道都算OK，可試。至於Cereal、果汁果兩part，對唔住真係頂住食唔落了。

大量包包！

整體嚟講，呢個早餐buffet 好值得食，如果入住巴黎人，記住揀包埋早/午餐buffet 嘅package。

法式餐廳．抵食Set Lunch

食完早餐，喺巴黎人同金沙度假區行下買下，又差唔多到食Lunch 時間，原本想食巴黎鐵塔入面間巴黎軒，但full 咗，今次無得食，最後去咗法式餐廳——Brasserie。

Brasserie 有午市Lunch Set，2 courses MOP168、3 courses MOP198。一於叫3 courses！

小編Appetizer 揀咗蟹餅，Main course 揀咗烤三文魚伴薯蓉，Dessert 揀咗Creme Brulee。旅友Appetizer 揀咗香草三文魚，Main course 揀咗牛扒伴薯條，Dessert 揀咗Fruit de Saison。

先講Appetizer，蟹餅賣相好靚，用咗唔少蟹肉，食落有陣陣蟹味！掂！至於香草三文魚，份量足，味邊亦唔錯。

賣相好吸引嘅蟹餅！

香草三文魚

Main course 方面，我嘅烤三文魚烤得剛好，表面香脆之餘，裡面保留了肉汁。至於旅友嘅牛扒，她則說麻麻地，不太有牛味！反而伴碟嘅薯條就幾香脆好味！

烤三文魚

牛扒伴薯條

最後係Dessert，Creme Brulee 表面焦香，入面軟滑！Fruit de Saison 亦都做得唔錯！

總體嚟講，除咗年扒，其他的都做得唔錯！最重要係價錢好抵食！以呢個價錢，有齊頭盤、主菜、甜品，仲想點先？

巴黎鐵塔的日與夜

除咗睇Show 同飲飲食食，去得巴黎人，如果時間許可不妨登上巴黎鐵塔37樓觀景台欣賞澳門嘅市景，而晚上嘅鐵塔燈光Show 就更加係不能錯過。

先講37樓觀景台，由於今次個package 包埋觀景台嘅門票，所以小編覺得上去看看是有趣的，不過如果要另購門票俾$100上去嘅話，小編會覺得有啲肉赤，雖然上到去視野遼闊，但四處的景晚未算動人。反而遠觀巴黎鐵塔就令人讚歎！尤其係鐵塔燈光Show，真係好靚，如果同至愛一齊欣賞更加係啱feel 又浪漫！

最後送俾大家巴黎鐵塔的日與夜。